Forskingsrådet avviklar rundsumsatsen

Vi forventar at endringa vil bidra til forenklingar i sektoren og eit meir oversiktleg tilskotsregelverk for søkjarane våre.

Kvifor gjer vi denne endringa?

Rundsumsats har vorte gitt som ei maksimal støtte til forskar og stipendiatårsverk i UH-sektoren. Når årsverkskostnaden (TDI) for ein tilsett overstig denne satsen, betyr det at sektoren må stille med eigenfinansiering for å gjennomføre prosjektet.

Forskingsrådet skal som regel ikkje stille krav om eigenfinansiering frå forskingsorganisasjonar. Sektoren kan likevel bidra med eigne midlar dersom samla prosjektkostnader overstig det maksimale støttebeløpet til utlysingane.

Kva inneber dette for søkjarar?

Endringane vil først og fremst få noko å seie for prosjektbudsjettering i UH-sektoren og for helseføretak når forskingspersonell deltek i prosjekt. Vi ber om eit totalkostbudsjett i søknader og vi finansierer ein del av dei samla kostnadene. Det vil ikkje lenger vere nødvendig å berekne støtte til personal- og indirekte kostnader separat.

Andre søkjargrupper som i dag har lagt rundsumsats til grunn for budsjettering av stipendiatstillingar, må endre praksis. Budsjettering av slike stillingar skal følgje andre retningslinjer for personal- og indirekte kostnader i dei respektive sektorane.

Kva med prosjekt som er i gang?

Fjerning av rundsumsatsen vil ikkje få noka tilbakeverkande kraft. For alle igangverande prosjekt gjeld budsjettet som ligg til grunn for vedtaket (kontrakten). Rapportering av kostnader i rekneskaps- og sluttrapport skal basere seg på faktiske kostnader. Berre når det er gitt eksplisitt løyve, kan rundsumsats brukast som kostnadsgrunnlag.

Meir informasjon

Vi vil så snart som mogleg gå i dialog med sektoren for å avklare eventuelle problemstillingar.

Vi oppdaterer nettsidene og retningslinjene våre i nær framtid med meir rettleiing. Søkjarwebinar vinter og vår 2026 vil også ha søkjelys på dette.

På NARMA-konferansen 17.–18. mars i Lillestrøm, vil vi presentere og diskutere endringar i finansieringsmodellen og andre endringar som kjem i samband med innfasing av nytt søknads- og saksbehandlingssystem våren i 2026.